Onlar Azərbaycan hüquq müdafiə təşkilatlarına mesajlarında, azərbaycanlı fəalı dəstəklədiklərini və Azərbaycan xalqının hüquqları uğrunda mübarizənin davam etdiriləcəyini vurğulayıblar.
Azərbaycanlı fəallar qeyd ediblər ki, Yılmaz Mehrəlibəyli illərdir kimliyi, dili, insan haqları uğrunda mübarizə aparan bir millətin iradəsinin simvoludur. Onların fikrincə, İslam Respublikası repressiya və hədə-qorxu ilə Azərbaycan millətinin haqq səsini susdura bilməyəcək və bu səs hər gün daha da ucadan eşidiləcək.
Fəalların mesajında deyilir: “Yılmaz və azadlıq döyüşçülərini susmağa məcbur etmək mümkün olmayacaq. Bu təzyiqlər bizi yolumuza davam etməkdə daha da əzmkar və inadkar edəcək”.
Azərbaycanlı fəallar həmçinin beynəlxalq qurumları və insan haqları təşkilatlarını bu repressiyalar qarşısında səssiz qalmamağa, İslam Respublikasını Yılmaz Mehrəlibəyli və digər türk siyasi məhbuslarını qeyd-şərtsiz azad etməyə məcbur etmək üçün dəstək göstərmələrini istəyiblər.
