Güney Azərbaycanın türk milləti, İranın zülm altında olan xalqları, azadlıqsevərlər və əziz vətənlərimiz!
Nəhayət, İran İslam Respublikası bir müharibə başladı; bu müharibə müdafiə məqsədilə deyil, illərdir davam edən böhran yaratma, təcavüzkarlıq və imperialist siyasətlərinin yeni bir mərhələsi kimi regionu oda bürüdü. Son 44 ildə dəfələrlə şahidi olduğumuz kimi, bu od yenə də illərlə zülm, yoxsulluq, işsizlik və fəlakətə məruz qalmış xalqların bədəninə tuş gəldi.
Rejim başçıları təbliğat və hərbi şoularla güclü bir imic sərgiləməyə çalışsalar da, gerçək budur ki, İranın müdafiə sistemi çöküb və ölkə miqyasında bir qorxu dalğası yayılıb. Təəssüf ki, Güney Azərbaycanın türk milləti də bu imperialist siyasətin bəlasından sığortalanmayıb. Təbriz, Urmiya, Ərdəbil, Mərənd, Marağa, Tufarqan (Azərşəhr), Poldəşd, Xoy, Xana (Piranşəhr) və Azərbaycanın digər bölgələri bu faşist və macərapərəst rejimin siyasətlərinin qurbanına çevrilib, qorxu və həyəcan millətimizin ailələrini bürüyüb.
İran rejimi onilliklər ərzində xalqın milyardlarla dollar sərvətini insanları qıran, müharibəçi və guya nüvə texnologiyası adı ilə həyata keçirdiyi layihələrə israf edib; bu layihələr – ümumilikdə iki trilyon dollardan artıq xərc çəkilməsinə baxmayaraq – ölkənin rifahına, təhlükəsizliyinə və inkişafına heç bir töhfə verməyib, əksinə iqtisadi, sənaye, səhiyyə və sosial infrastrukturunu məhvə sürükləyib.
Biz, hər cür zorakılığı və müharibəni qətiyyətlə pisləyir, İran İslam Respublikasını bu böhranın birbaşa və əsas məsulu hesab edirik. Güney Azərbaycan Milli Hərəkatının siyasi təşkilatları olaraq, bu toqquşmaların Güney Azərbaycanın türk milləti və digər zülm altındakı xalqlar üçün nəticələrini diqqətlə izləyirik. Biz inanırıq ki, xalqımızın gələcəyi, taleyi, canı və malı heç bir zaman Tehran rejiminin faşist və ekspansionist siyasətlərinə qurban verilməməlidir.
Azərbaycan türklərinin regiondakı heç bir xalq və dövlətlə düşmənçiliyi yoxdur və tarix sübut edir ki, Azərbaycan daim sülh, qarşılıqlı hörmət və ləyaqətli birgəyaşayış tərəfdarı olub.
Biz eyni zamanda xəbərdarlıq edirik: İran rejimi hər zamankı kimi bu müharibə atmosferindən daxildəki basqıları artırmaq üçün fürsət kimi istifadə etməyə çalışacaq. Hazırda da azadlıqsevər qüvvələrə, siyasi, ictimai və mədəni fəallara və zülm altında olan xalqlara qarşı təzyiqlərin artdığına dair əlamətlər görünməkdədir. Biz xəbərdarlıq edirik ki, əgər rejim bu hadisələri milli fəallara qarşı küçə təqibləri, həbslər və təhdidlər üçün bəhanəyə çevirərsə, o zaman Güney Azərbaycan millətinin sərt və inqilabi qəzəbi ilə qarşılaşacaq.
Biz həmçinin İranın hərbi strukturlarında çalışan türk zabit və şəxsi heyətinə səslənirik:
Bu gün qərar vermə günüdür. Siz Azərbaycan xalqının qurtuluş tarixində dönüş nöqtəsi ola bilərsiniz. Gələcəyiniz, kökləriniz və övladlarınız olan xalqınızın yanında olun. Sizin sədaqətiniz rejimə deyil, Vətənə, xalqınıza və Azərbaycanın gələcəyinə olmalıdır.
Sonda, bütün milli fəalları, tərəfdarları və Milli Hərəkatın simpatiya bəsləyənlərini bu həssas tarixi mərhələdə hər zamankından daha ayıq, yaradıcı və mübarizə baxımından çevik olmağa çağırırıq. Küçə və meydan fəaliyyətlərində müdriklik göstərsinlər, sayıqlığı əldən verməsinlər və keçmiş yüz ilin səhvlərinin təkrarlanmasına imkan verməsinlər. Məqsədimiz aydındır: Güney Azərbaycanın səadəti və milli azadlığı.
Biz müharibədən qorxmuruq, amma övladlarımızın korrupsiyalaşmış və işğalçı bir rejimin varlığı uğrunda aparılan bir müharibəyə qurban verilməsinə əsla icazə verməyəcəyik.
Azərbaycan Mərkəz Partiyası – AMP
Azərbaycan Milli Dirəniş Təşkilatı – Dirəniş
Azərbaycan Öyrənci Hərəkəti – AZOH
Güney Azərbaycan Demokrat Partisi – GADP
