قاراقؽشلاق اهالیسی نین دردی تکجه بو کندین یوخ بۆتۆن آزربایجانین دردی دیر. بونونلادا بو حاقلؽ اعتراضا بۆتۆن آزربایجان قاتؽلمالؽدؽر. بو گۆن حاکمییت بو کندین سسینی بوغورسا صاباح آزربایجانؽن کند-کند، شهر-شهر سسینی بوغاجاقدؽر.
نظره آلساق کؽ، چئوره یاشامؽ قوروما مسئله سی یالنؽز بیر بؤلگه یه مخصوص دؽییل؛ او، بۆتۆن اؤلکه نین و دۆنیانؽن مسئله سی سایؽلؽر و هرهانسؽ بیر بؤلگه ده چئوره یاشاما دییلن خسارت باشقا قونشو بؤلگه لردن یان کئچمه یه جک. بونونلادا چئوره سل قورومانؽن اهمییتی بین الخالق کنوانسیونلاردا و اؤلکه قانونلارؽندا او جۆمله دن ایران ایسلام جومهورییتی نین آنایاساسی نؽن ۵۰-جی پیرینسیپینده اؤزۆنو تصدیق لییبدیر.
دمؤکراتیک سیستم لرده چئوره یاشاملا باغلؽ دولت طرفیندن هر هانسؽ بیر چاتشمامازلؽق اورتایا چؽخارسا اؤلکه ده فعالییت گؤسترن چوخ سایلؽ غیری حؤکۆمت تشکیلاتلار (NGO- لار)، مستقیل مئدیالار، میللت وکیللری هابئله رقیب پارتؽیالار اؤلکه اهالیسی نی حاکمییته قارشؽ بیر آرایا گتیریب و حاکمییتی گئریه اوتورتماق گۆجۆنه مالیک دیرلر.
آنجاق ایران ایسلام جومهورییتینده NGO- لارؽن، سیاسؽ پارتییالارؽن، مستقیل کۆتله وی اینفارماسؽیا واسیطه لری نین و… قاداغان اولونماسؽ و هر هانسؽ بیر دینج اعتراضا حاکمییتین سرت تپگیسی، چئوره یاشامؽمؽزؽن پوزولماسؽیلا باغلؽ، حاکمییت طرفیندن گۆنۆ-گۆندن اتومیزه لشن و مین بیر حیصّه یه پارچالانان خالقؽمؽزؽ بیر آرایا گتیرمک هئچ ده راحات بیر ایش دئییل.
بۆتۆن بونلارا باخمایاراق، گۆنئی آزربایجان میللی حرکاتؽ هر دفعه اولدوغو کیمی خالقؽمؽزؽن، اؤزللیکله قاراقؽشلاق اهالیسی نین آرخاسؽندا دورور و اونلارؽن حاقلؽ اعتراضلارؽنا قاتؽلؽر. خالقؽمؽزا قارشؽ تؤردیلن بو وحشیلیک لر هئچ زامان اونودولمایاجاق. اونون دیلینه، ائولادلارؽنا و وطنینه دۆشمن کسیلنلر، پهلویلر سۆلاله سی کیمی، «سیلی سختی خواهند خورد».
