عزیز میللتیمیز
بو گون آرتیق هئچ کیمه سیرّ دئییل کی ، ایرانین اَن بؤیوک میلّی قروپو اولان تورک خالقی اوزون ایللردیر آغیر بیر ظولم و عدالتسیزلیکله اوز-اوزه دیر .
تئوکراتیک رئژیم اؤز وارلیغینی قوروماق نامینه اؤلکه’نین میلّی ثروتلرینی اساسسیز ایدئولوژی ماجرالارا صرف ائتمیش، خالقین جانینی و مالینی گیروو ساخلامیشدیر .
حاکیميّتین یگانه مقصدی اؤز مؤوجودییتینی اوزاتماق اولموشدور .
سون یاریم عصرده ایران ایسلام جمهوریتی باشدا آذربایجان اولماقلا، بو اؤلکده یاشایان بوتون میللتلره یالنیز ظولم، آجی و فلاکت گتیرمیشدیر. بو گون اهالیسینین یاریدان چوخونو آذربایجان و دیگر تورک توپلولوقلارینین تشکیل ائتدیغی ایراندا ، رئژیمین تئررورا اساسلانان سیاستی نتیجه سینده مینلرله اینسانیمیز فیزیکی، معنوی و روانی(پسیخولوژی) عذابلار ایچریسینده یاشاماغا مجبور ائدیلیر خالقیمیزین ان ابتدایی (فوندامئنتال) حوقوقلاری ایسه سیستماتیک شکیلده پوزولور .
سون ایکی هفته’ده ایران- اسرائیل موناقیشه’سی چرچیوه سینده بوتون دونیانین گؤزو اؤنونده بیر داها شاهید اولدوق کی بو رئژیم میللتلری نئجه آغیر شرطلر آلتیندا یاشاماغا مجبور ائدیر .
بو ساواشین یاراتدیغی فاجعه‌‌وی وضعيّت ایران رئژیمینین بولگه ده( رئگیونو) نئجه بیر اوچوروما سوروکلَدیغینی آچیق شکیلده اورتایا قویور .
لاکین تأسف کی، بئله بیر تاریخی و حساس مقامدا بعضی رادیکال کورد قروپلاشمالاری یئنیدن آذربایجان تورپاقلارینا اساسسیز ادعالار ایرلی سورمکده و تورپاقلاریمیزین ایشغالی اوچون چاغیریشلار وئرمکده دیرلر. میللتلرین بیرگه موباریزسی اوچون اَل‌وئریشلی شرایطین یاراندیغی بیر مرحله‌‌ده، بو جهدلر نه تصادوفدور، نه ده ساده یئرلی موناقیشه دن عبارتدیر.
بو فعالیّتلر بیرباشا، میللتلرین بیرلیغینی پوزماق مقصدی داشییر و ایران رئژیمینین عومرونو اوزاتماقدان باشقا هئچ بیر ایشه یاراماز .
بو تررور قروپلاشمالارینین آذربایجان تورپاقلارینی ایشغال و ایستیلا چاغیریشلاری قارشیسیندا ایسه، مرکزی حاکیميّتین سسیزلیعیی سون درجه معنی‌داردیر.
محض بئله بیر وضعيّتده آذربایجان خالقینین اؤزو اؤز مودافیعه’سینی تشکیل ائتمکدن باشقا یولو قالمیر .
شوبهه ائتمیریک کی ، آذربایجان خالقی اؤزونو مودافیعه ائتمک گوجونده دیر و بو یولدا بوتون ایمکانلارینی سفربر ائدَرَک، آذربایجان تورپاقلارندا تئررور قروپلاشمالارینین بارینماسینا ایذن وئرمیَجَکدیر .
امینیک کی بو یولدا صولحون و ثابتلیغین طرفداری اولان قونشو دؤولتلر و خالقلار ائلجه ده دونیانین مترقّی قوووه لری بیزیم یانیمیزدا اولاجاقدیر .
بو حساس و تاریخی مقامدا بیز گونئی آذربایجان تشکیلاتلاری اولاراق اؤز تورپاقلاریمیزدا اؤز موقدّراتیمیزی تعیین ائتمک مقصدی ایله بیر آرایا گلدیغیمیزی ، هر زامان اولدوغو کیمی بوندان سونرادا بو جوغرافیادا بوتون خالقلارین باریش و دایانیشما ایچینده یاشامالاری ایلکه’سینی رهبر توتاجاغیمیزی و،ایرق ،دیل ،دین مذهب و.س آییرد ائتمه’دن، بوتون کسیملَرین حاق ، آزادلیق و تهلوکه‌‌سیزلیغینین تأمیناتچیسی اولاجاغیمیزی و ائله بو مقصدله’ده، گونئی آذربایجان تشکیلاتلارینین امکداشلیق شوراسینی(گاتش) تأسیس ائتدیغیمیزی بَیان ائدیر و خالقیمیزا سسلنیریک:
• میلّی بیرلیغیمیزی مؤحکملَندیرَک
•وطنیمیزی ،تورپاقلاریمیزی میلّی کیملیعیمیزی بیرلیکده قورویاق
• قارشیداکی تهلوکه‌‌لره قارشی آییق و حاضرلیقل اولاق
آزادلیق ،عدالت ،میلّی حؤکومت
گله جک بیزیمدیر
27/06/2025
ایمضالایان تئشکیلاتلار:
۱. آذربایجان دموکرات فیرقه سی – آ.د.ف
۲. آذربایجان مرکز پارتیسی – آ.م.پ
۳. آذربایجان میلّی دیرنیش تشکیلاتی – دیرنیش
۴. آذربایجان اؤیرنجی حرکاتی – آزوح
۵. گونئی آذربایجان جومهورییت پارتیسی – آ.ج.پ
۶. گونئی آذربایجان دموکرات پارتیسی – گادپ
۷. گونئی آذربایجان ایستقلال پارتیسی – گایپ
۸. گونئی آذربایجان میلّی اؤزگورلوک جبهه سی – گاماج
۹. گونئی آذربایجان میلّی دئولئتچیلیک شوراسی – ام.د.ش
۱۰. گونئی آذربایجان اؤغرئنجی بیرلیغی – گاوب
۱۱ .گونئی آذربایجان قورتولوش پارتیسی – گاقپ
