Ötən gün səhər saatlarında İran rejiminin əmniyət qüvvələri bələdiyyə işçilərinin müşayiəti ilə Təbrizin Oğlu kəndi ətrafındakı torpaq sahələrinə girərək, evlərin və bağların divarlarını dağıtmağa cəhd göstərib ki, kəndlilərin müqaviməti ilə üzləşərək ərazidən uzaqlaşmaq məcburiyyətində qalıblar.
“Aznews tv” xəbərinə görə, lakin bir neçə saat sonra onlarla xüsusi təyinatlı hərbi texnika ilə yenidən həmin əraziyə gəlib və kənd sakinləri ilə aralarında şiddətli toqquşma baş verib.
Toqquşmalarda xüsusi polis qüvvələri kənd əhalisinə vəhşicəsinə hücum edərək döyməklə yanaşı, onların əmlakına və avtomobillərinə də ziyan vurub, bəzi avtomobillərin şüşələrini sındırıb, bəzilərinin dövlət nömrə nişanlarını özləri ilə aparıblar.
İki saatdan çox davam edən qarşıdurma nəticəsində kənddə bir neçə tikili dağıdılıb.
Təhlükəsizlik qüvvələri 5 kənd sakinini həbs edib və onlar barəsində həbs qərarı çıxarılıb.
