فرانسا اینقیلابینین اساس شوعاری “آزادلیق، برابرلیک و قارداشلیق” ایدی. آنجاق اینقیلابدان سونرا باش وئرن قانلی اولایلار، اونلاری بو نتیجه یه چاتدیرمیشدیر کی، قارداشلیق یئرینه تلورانس (دوزوملولوک) داها یئیمیش (ترجیح ایمیش). تلورانس بیزیمله موخالیف اولان و به ینمه دیییمیز عقیده نین و اونو داشییانلارین وار اولدوغونا دوزمکدیر؛ اونلارین وارلیغینی قبول ائتمکدیر. اونلارین حتی زیانلی اولدوغونو دوشونسک ده، قابالیق و خشونته ال آتمادان اونلارا یاناشماقدیر. دوزوملولوک شخص لره و قوروملارا یونه لیک بیر اوزللیک دیر و گلجکده دوولتین قوراللاریندان اولان “عقیده آزادلیغینین” تملی دیر. آنجاق بیر ناسیونالیستی حرکت اولاراق، بیرلشمه یه احتیاجیمیز اولدوغو اوچون دوزوملولوک و موخالیف توتوم و سلیقه لره دوزمک واز گئچیلمز اوزل لیک دیر. بو اوزل لییی داشییان شخص و تشکیلاتلاریمیزا البته کی حاکمیت دوزه بیلمز.
ائله اونون اوچون دور کی تلورانسین میللی حرکتیمیزده سیمگه سی اولان ماحمود بی بیلگین حاکمیتین سیبلینده دیر.
خوشبختلیکله میللی حرکتیمیزده تلورانس کوک سالیب و هئچ بیر قورغو ایله بو حرکتی اینحیصارچیلیغا، دیکتاتورلوغا سوروکله مک اولماز. بوگون موختلیف فیکیرلره یئر وئریلن و گلجه یین پلورازمینی گارانتی ائدن ANTV کیمی تئلویزیالاریمیز و تلورانسلا بوتون سلیقه لره یاناشان، اویرنجی حرکاتی نی یانار ساخلایان آذوح کیمی تشکیلاتلاریمیز وار.
ناسیونالیزمین اساس ایشله ولریندن بیری، میللی بیرلیک یاراتماقدیر. میللی حاکمیت اوغروندا میللی بیرلیک یاراتماق اوچون تلورانس دان داها اوستون بیر اوزللییه ییه لنمک گرکیر. دیره نیش تشکیلاتی نین میللی موجادیله بایراغینی منیمسه مه سی بو قونودا ان اونملی اورنک دیر. بیز اوز توتدوغوموز استراتژیمیزه تام ایناندیغیمیز حالدا، “آزادلیق، عدالت، میللی حکومت” اوغروندا چالیشان بوتون شخص و تشکیلاتلاری اوزوموزدن بیلیریک.
