İranSiyasət

BMT-nin xüsusi məruzəçisinin güneyli siyasi məhbuslarla bağlı hesabatı yayıldı

Birləşmiş Millətlər Təşkilatının (BMT) İranda İnsan Haqları Üzrə xüsusi məruzəçisi professor Cavid Rəhmanın ölkədə ana dilində təhsil hüququnun pozulması və güney azərbaycanlı siyasi məhbuslar barədə hesabatının bir hissəsi yayılıb.

Hesabatda İranda ölüm hökmü, əsassız həbslər, söz azadlığının məhdudlaşdırılması, dinc toplaşmanın qarşısının alınması, standart yaşayış səviyyəsi, İran hökumətinin koronavirusla bağlı gördüyü tədbirlər, qadınların, etniklərin və dini azlıqların durumu əks olunub.

Professor Cavid Rəhman hesabatın hazırlanmasında bir sıra insan haqları təşkilatının, o cümlədən “Ərk”-Azərbaycan İnsan Haqları Cəmiyyətinin yayınladığı hesabatlara istinad edib.

BMT-nin İran üzrə xüsusi məruzəçisi, professor Cavid Rəhmanın hesabatı 10 fevral 2022-ci ildə dərc olunub. Hesabat 2022-ci il martın 17-də Cenevrədə BMT-nin İnsan Hüquqları üzrə 49-cu sammitində təqdim ediləcək.

Professor Cavid Rəhmanın məruzəsinin 47-ci bəndində bəzi mədəni məhbusların adları, məhkumluqları qeyd olunur.

Sənəddə Azərbaycan İnsan Haqları Cəmiyyəti-ƏRK-in hesabatlarına istinadə edilərək ana dilində təhsilin qadağan edilməsindən bəhs edilir.

“Ana dilində təhsil hüququna qoyulan məhdudiyyətlər azlıqları narahat etməkdə davam edir. Azərbaycan türklərinin hüquqlarının müdafiəçiləri Abbas Lisani və Əlirza Fərşi hələ də həbsdədir.

Başqa bir azərbaycanlı mədəni fəal, 2021-ci ilin iyul ayı etirazları ilə bağlı saxlanılan Pərviz Siyabi 16 il həbs cəzasına məhkum edilib və cəzanın 10 ilini həbsxanada keçirməli olduğu barədə qəti rəy verilib”-deyə, hesabatda qeyd olunub.

Hesabatda habelə 2020-ci ilin oktyabrında keçirilən etiraz aksiyaları zamanı həbs olunan 12 azərbaycanlı türk fəalın 2021-ci ilin oktyabrında Ərdəbil məhkəməsi tərəfindən 14 ay həbs və 74 şallaq cəzasına məhkum edildiyi yazılıb.

Xüsusi Məruzəçi 2022-ci ilin yanvarında öz hesabatını İran İslam Respublikasına təqdim edib və İran İslam Respublikasının nümayəndəsi özünün cavab məktubunda hökumətin rəyini yazılı olaraq BMT nümayəndəsinə göndərib.

“İran hökuməti həmçinin bəyan edib ki, konstitusiyanın 15-ci maddəsi məktəblərdə yerli və etnik dillərin tədrisinə icazə verir və bir sıra universitetlər tədris zamanı yerli dillərdən istifadə edir”-deyə, İran nümayəndəsi BMT məruzəçisinə göndərdiyi cavab məktubunda iddia edib.

Related Articles

Bir cavab yazın

Back to top button