“Aznews tv”nın xəbərinə görə, bu barədə Birləşmiş Millətlər Təşkilatının İranda insan haqları üzrə xüsusi məruzəçi Cavid Rəhman dünən İnsan Haqları Təşkilatının Cenevrədə keçirilən iclasındakı çıxışı zamanı bildirib.
“İslam Cümhuriyyətində insan haqlarını pozanların toxunulmazlığı var və beynəlxalq ictimaiyyət bu hökuməti insan haqlarının pozulmasına görə cavabdeh etməlidir”,-deyə o vurğulayıb.
C.Rəhman İranda geniş yayılmış insan haqları pozuntularının bir hissəsi kimi iki azyaşlı cinayətkarın və 10 qadının edam edilməsi də daxil olmaqla, edamların və əsassız həbslərin artması və məhbusların ölümünü haqqında danışıb.
O, eyni zamanda ölkədə İran hökuməti tərəfindən qeyri-fars millətlərin həbsi, mediaya təzyiqlər və söz azadlığının məhdudlaşdırılması, dinc etirazların zorakılıqla yatırılması, standart həyat hüququnun pozulması, qadın hüquqlarının tapdalanması, koronavirus epidemiyası dövründə insanların sağlam, təhlükəsiz və təsirli vaksin əldə etmə hüququndan məhrum edilməsini İranda insan haqları pozuntularının daha bir nümunəsi adlandırıb.
