Amerika Xarici İşlər Vəzirliyinin sözçüsü Morqan Ortaqus, İranın məhkəmə orqanları tərəfindən insan haqlarını pozması ilə bağlı ixtar verib. Habelə, beynəlmiləl birliyi İranı insan haqlarının pozulmasına görə məsuliyyətə cəlb etməyə çağırıb. Ortaqus cümə günü Tvitterdə video müraciətində məsələyə münasibət bildirib. “İnsan haqlarının pozulmasında iştirak edən bütün İran məqamları cavabdehlik daşımalıdır. Amerika, beynəlmiləl birliyi bu məsələ ilə bağlı müstəqil araşdırma aparmağa çağırır” deyə o, qeyd edib. Bildirilib ki, İran məhkəməsi ədaləti icra etmək yerinə, ədalətsizliyə yol verir və insan haqlarını pozur. “Biz beynəlmiləl camiəni və ayrı-ayrı dövlətləri onları məsuliyyətə cəlb etməyə çağırırıq. Bu rejimin çox sayda qurbanları üçün ədalət tələb edirik”-deyə o əlavə edib. Sözçü Evin zindanında İran əsilli kanadalı jurnalist Zəhra Kazeminin “vəhşicəsinə öldürülməsinin” ildönümü olduğunu də xatırladıb. Onun sözlərinə görə, İran məhkəmə orqanlarının Zəhranın öldürülməsində əli olması ilə bağlı bilgilər var. Buna baxmayaraq, indiyədək həmin məqamların heç biri məsuliyyətə cəlb edilməyib. Ortaqus, habelə 29 tirdə İranda “Ölüm komitələrinin” yaranmasının ildönümünə də işarə edib. Qeyd edib ki, həmin komitələr Xomeyninin göstərişi ilə minlərlə müxalif siyasi məhbusu itkin salıb və edam edib.
