مهر-ین بیری غیر فارس میللت‌لر اوچون “اؤگی آنا دیلی” ساییلیر. بیر ایل ایکی آی (اؤنجه‌کی 2آی توتوقلانماغی نظرده آلمایاراق) مورخصی‌سیز بیرباشا ائوین زیندانین 4-جو بندین 3-جو سالونوندا کئچیردی. یاخالانمامیشدان دیش آغریسی وار ایدی. دیش آغریسی‌نین توختاتماغا ائوین زیندانینین ساغلیق سوروملولاری 10 آیدان چوخ سوروندوردولر. اکبر نعیمی 1398-جی ایلین بهمن آییندان ایشیندن چیخاریلیب. ایجتیماعی بوتون حاقلاریندان منع اولوبدور. بونلارا ندن اولان قوندارما قارایاخمالار دیر. بو قارا یاخمالاری اینجه‌له‌دیکده بو سونوجلار ایله اوزله‌شیریک:
سوچلامالارین بیرینجی‌سی “موعانید قوروپلارین چیخارلاری اوزره ایران اسلامی جمهوریتینه قارشی تبلیغ آپارمارق” دیر. هانسی قوروپ و نئجه او قوروپو رئکلام ائله‌مه‌سی نه تکجه حؤکم‌ده بلکه دوسیادا دا آچیقلانمیر. آچیقلانمایان، بلگه‌سیز قارایاخما اوچون 8 آی زیندان حؤکمو کسیرلر.
وورولان ایکینجی سوچلاما؛ “اؤلکه‌نین تهلوکه‌سیزلی‌یینی خطره سالماق اوچون توپلانما(اجتماع) ایله قوروشما(تبانی)” اولور. بو سوچلاما ندنی ایله 4 ایل قطعی حبس جزاسی کسیرلر. بونا فاکت اولاراق 1392-جی ایلین فئورال آیی‌نین 2-سینده تئهرانین چئوره‌سینده یئرله‌شن نسیم‌شهرده آنادیلی موناسیبتی ایله قورولان تؤرنی گؤسته‌ریرلر. همان گون امنیتی قوه‌لر تؤرَنه باسقی وئریب، تؤنده اولان‌لارین نئچه‌سینی یاخالامیشدیلار. اوندان سونراکی گونلر ده نئچه باشقاسی‌نین دالیسیجا گئدیب یاخالاتمیشدیلار. او ایل اکبر نعیمی‌نین دالیسیجا هئچ بیر امنیتی قوه گئتمه‌میشدی. اونونلا بئله ائو صاحابی بوتون سوچلامالاردان برائت آلمیشدی. او دوسیا باغلانیب، آلتی ایل کئچندن سونرا او تؤرنده اولوب آنا دیلی حاقدا دانیشماغی حاکمیتین علیهینه قوروشما ساییب 4 ایل قطعی جبس جزاسی کسیرلر.
اوچونجو ایتتیهام ایران ایله دونیادا وورولان بیر ایلک ساییلیر: «سئپاراتچی “پان تورکیسم ایله پان آذریسم” قوروپلاریندا عوضو اولماق ایله اؤلکه‌نین تهلوکه‌سیزلی‌یینه قارشی آددیم آتماق». بو ایتتیهاما گؤره 5 ایل قطعی حبس جزاسی کسیرلر. “آذری” کلمه‌سی احمد کسروی‌نین آذربایجان تورک‌لرینین تورکلویونو دانماق اوچون یاراتدیغی قوندارما دیل آدی دیر. احمد کسروی ماسون قوروم‌لار اؤزل‌لیک‌له “اینگیلیس‌لی ادوارد براون” ایله تانیش اولاندان سونرا بو سؤزجویو یارادیر. “آذری” سؤزجویو سورعتله دونیا دایره‌المعاریف‌لرینده آذربایجان تورکجه‌سینین باشلیغی یئرینه اوتورور. ایراندا پان‌فارسچیلیغی ایران‌شهری آدی ایله یایان قوروم‌لار “آذری” کلمه‌سیندن یولا چیخاراق آذربایجانلی‌لاری آذری آدلاندیریب تورک دونیاسیندان قوپارماق ایسته‌دیلر. “پان تورک” بیر فرهنگی یاناشما اولدوغونا باخمایاراق، پان‌فارسلار اونو سیاسی دیرلندیرمه‌یه چالیشدیلار.
ایراندا دولتی ایله حاکمیتی اورقانلار اللرینده اولدوقلاری اوچون بو آددا(پان تورک) قارایاخما ایله آذربایجانین دیل، کولتور، چئوره، ایقتیصادینا دوشونن اینسانلاری سوچلاییب توپلوم ایله اؤلکه‌دن اوزاقلاشدیرماغا چالیشیب‌لار. “پان آذری ” سؤزجویو یارانمامیشدی، یارانسایدی “پان تورک” ایله “پان آذری” تئرمین‌لری بیربیرینه قارشی تئرمین‌لر اولمالی دیلار. سون زامان‌لار “پان آذری” تئرمینی ایران‌شهری جریانینا منسوب آدام‌لارین طرفیندن اورتایا قویولوبدور. فارس دیلیندن سئوای دا هئچ بیر دیلده یئرینی آچا بیلمه‌ییب دیر.
پان آذریسم عنوانی بیرینجی دفعه “ابرار” قورومونون واسیطه‌سیله “احمد کاظمی” آدیندا یازارین یازدیغی «پان ترکیسم و پان آذریسم» آدلی یاییلان کیتابی ایله بلگه‌له‌نیر. ایران‌شهرچی یازارلار؛ حئیدر علی‌یئو نخجوان موختار رئسپوبلیکاسی‌نین جمهور باشقانی‌نین، آذربایجان جمهوری‌سینین ایکینجی موستقیل‌لیک ایسته‌یینه گئدن یولدا آذربایجانلی‌لارین آراز چایی‌نین ایکی تاییندا ییغیشیب بیر-بیرلرینی سسله‌مک موناسیبتی ایله دئکابرین 31-نی دونیا آذربایجانلی‌لار گونو آدلاندیردیغی دیر. بو دوغرولتودا یازیلان مقاله‌لر ده ائله همن “احمد کاظمی” ایله بیر باشقا نئچه نفرین (حسین احمدی، برهان حشمتی، ..) ایش‌بیرلیگیله اولور.
ماراقلی بودور بو تئرمینی تورکچولویون قارشیسیندا اورتایا گتیریر. داها دوغروسو آذربایجان‌چیلیغی تورکچولویه قارشی گؤرور.
