Millət vəkili yeni hökumətin işə başlaması ilə eyni vaxtda ötənbir il ərzində Şərqi Azərbaycan əyalətində fəaliyyət göstərən layihələrin əksəriyyəti yarımçıq dayandırıldığını söyləyib.
“Düzgün idarəetmənin olmaması, layihələrin gedişatından xəbəri olmayan insanların gəlişi, podratçıların əmək haqlarının verilməməsi və layihə büdcəsinin ayrılmaması tikinti layihələrinin dayandırılmasına, Urmu gölünün hazırkı acınacaqlı vəziyyətə düşməsinə səbəb olub”-deyə, Məsud Pezeşkiyan bildirib.
O, Urmu gölünün yenidən canlandırması layihəsi çərçivəsində başladılan və işlərinin çoxunun görüldüyü Zab çayından gölə su nəqli kanalının İbrahim Rəisi hökuməti tərəfindən dayandırılmasının qaranlıq məqamlardan biri olduğunu deyib.
Millət vəkili Urmu Gölünün Bərpası Qərargahının Yoxlanılma Qurumunun yaradılmasının əleyhinə olmadığını, ancaq bu işlərin gözdən pərdə asmaq üçün ortaya atıldığını və gölün bərpası üçün real iş görülmədiyini qeyd edib.
Məsələ ilə bağlı “Əmi dərdi deyil zəmi dərdidir” atalar sözünü işlədən Pezeşkiyan, hökumətin son bir ildəki fəaliyyətinin onun Urmu gölünün bərpası və Azərbaycanda yarımçıq qalan layihələrin tamamlanması ilə bağlı iddəalarının səmimiliyini şübhə altına aldığını bildirib.
