تراختور تیمینین روابط عمومی’سینین یایینلادیغی معلوماتا گؤره، مصطفی دنیزلی، مسجد سلیمانین نفت تیمیله اویونونون عرفه’سینده اعلام ائله دی کی: آرتیق ایکی آیدان چوخدور کی مشقلریمیزی دواملی اولاراق باشلامیشیق و سونونجو مشقلریمیزی سوپرلیگ باشلامادان اؤنجه آرخادا قویموشوق.
او، بونا اشاره ائتمکله کی یئنی اویونچولار تیمه آرتیلیب، علاوه ائتدی: ایکی خارجه’لی اویونچو آلینیب و داها بیر خارجی اویونجو تیمه علاوه اولوناجاق.
تراختورون باش مشقچیسی، اؤنده اولان مسجد سلیمانین نفت تیمیله اویونون حاقیندا دئدی: لیگین ایلک اویونو اؤز یئریمیزده اولمادیغی اوچون و هابئله سفر شرطلرین نظره آلاندا، بو اوقدرده آسان دئییل، آمما بیز بوتون چتین شرایطلر اوچون تیمیمیزی حاضیر ائتمیشیک.
دنیزلی، سؤزلرینین آردیندا، تیمین سون هفته’لر تمرینلرینده صدمه گؤرن اویوچولار مسئله’سینه’ده اشاره ائدیب و آرتیردی؛ مازولا، محمدرضا اخباری و اکبر ایمانی – تمرینلریمیزده صدمه گؤروبلر، کی بو آرادا اکبر ایمانی’نین دورومو چوخ جیددیدیر.
هر حالدا، بو نوع مصدومییتلر نورمالدی و اولا بیلر اویوندا و یا مشقیده، اویونچو آغیر خسارت آلسین.
دنیزلی خاطیرلاتدی کی: مازولا و محمدرضا اخباری’نین حال حاضرده دوروملاری یاخشیدیر و اولارین بو اویوندا میدانا چیخیب و یا چیخماما حاقیندا، اویونون گونو قرار وئریله’جک.
او آرتیردی کی: اومارام بو سئزون بیته’نه کیمی داها اویونچولار صدمه گؤرمه’سینلر، چون من بیلیرم آذربایجانلیلارین تراختور تیمیندن نه گؤزلنتیلری وار و نه ایسته’یرلر. سوپر لیگ، ماراتون کیمیدیر، باشلانقیج اؤنملی و هابئله قورتولوش اونداندا اؤنملیدیر، کی بیزیم هر ایکیسینه’ده حاضیرلیغیمیز وار.
