اولو تانرینین آدیله
۰۳/۰۹/۰۳گئجه ساحات ۱۱ چاغیندا تبریزین ولیعصرینده دیواردا «آزادلیق» سوزجوکون یازدیقدان سونرا حیس ائله دیم آرخامدا آداملار وار،اوزومو چئویردیگیمده آزی ۷نفری گوردوم و او آندا بیری شوکر برقی له بوینومدان ووردو و دیگری باتوملا محکم ووردو قولومدان و منی هامیلیقجا ییخدیلار یئره ائله کی آنلیم،قوللاریم و دیزلریم خیاوان آسفالتیندا سوروندو.سونرا گوز باغی(چشم بند)ووروب اوستوندن قره و قالین بیر توربا باشیما گئچیردیلر آرخادان بیری دیزینی نه گوجو واریدی باسدی بئلیمه و قوللاریمی وحشیجه سینه آرخادان باغلادیلار.اوسته لیک سونرا باشیمی قالدیریب اوزومدن(توربا اوستوندن)یوموروق ووروب آغزی بورنومو قانا دولدوردولار و سورویوب سوخدولار بیر ماشینین دالی صندلین اورتاسیندا اوتورددولار،ایکی طرفیمده آدام اوتورددولار و باشیمی قاباخکی ایکی صندلین آراسینا باسدیلار او یانیمدا اوتورانلارین بیریسینین عقده سی بوشالمامیشدی دالدان ساغ الیمین باش بارماقین محکم اییب یئریندن چیخارتدی باشیم آشاغیدا اولارکن آغزی بیرنیمین قانی دولدو قره توربانین ایچینه و منه نفس چکمک چوخ زورلاشدی او قدر کی هر نفس آلیب وئردیگیمده نفسلریم قان ایچینده خییییرررر و خووووررر ائلییردی گوردولر کی نفس چکمک منه مومکون دئییل باشیمدان توربانی چیخارتدیلار و نمنه قان لخته سی واریدی توربادا توکولدو ایاق آلتینا تکجه قالدی گوز باغیم.ایطیلاعاتا آپاران یولدا هر جوره سویوش یامان دئدیلر.
چاتدیق ایطیلاعاتا حیاطا گلن بیر سیللی ووروب گئچدی و سونوندا آپاردیلار ایچه ریه آد،سوی آد و….سحره یاخین منه زنجیرلی پابند(قاندال)ووروب اللریمی آرخادان باغلاییب محلاتی خسته خاناسینا آپاردیلار بیر مسکن سرم ووردوردولار و داهی هئچ بیر یاراما و بارماقیم و قولوما هئچ بیر دوکتور باخیب معاینه ائتمه دی و الان منیم ساغ قولوم دیرسک قیسمتیندن کامیل آچیلیب باغلانمیر و هابئله باش بارماقیم.
سونرا منی آپاریب انفرادی سلولا و صاباحی ۶ ماشین آزی ۲۰ نفرله منی آپاردیلار آتام ائوینه و ائوی توکوب آخداردیلار،کیتابلاریمی و بیر چوخ شخصی وسایلریمی گوتوروب گتیردیلر و بیر هفته انفرادی و بازجویی دن سونرا زیندانین (بند امن)وئردیلر و بئش گوندن سونرا ۲۰۰تومنلیک وثیقه ایله موقتی بوراخیلدیم.
ماشینیم و بوتون ایش ابزارلاریم و باهالی اوزوک،ساحات و بیر چوخ باهالی اشیالاریم کی ماشیندادی پارکینگه وئریبلر و موبایلیم دا اونلارین الینده دیر.
(قضیه بودور)
