علنی محکمه قاورامی‌نین بیزیم اؤلکه‌ده آنایاسال بیر حاققا دؤنوشمه‌سین‌دن یوز ایل‌دن آرتیق کئچمه‌سینه باخمایاراق هله‌ده ۲۱-اینجی عصیرده ایران سیاسی آکتویستلر، اؤزللیکجه آزربایجان میللی حرکت فاعاللاری بو آنایاسال، مدنی، اینسانی حاقدان محروم قالمیش؛ حاقلی-حاقسیز «کیفر خواست»-لار نتیجه‌سینده توپلوما هئچ بیر آچیقلاما مقامیندا بولونماق فرصتینه صاحیب اولمادان، باغلی قاپیلار آرخاسیندا، فردیلشمیش رأی‌لره معروض اولوب، زیندانلاردا عؤمور سورمک مجبوریتینده قالیبلار.
ایران ایسلام جومهوریتی‌نین اؤز قانون وئریجیلیک سیستئمینده بئله، محکمه‌لرین علنی قورولماسی اساس شرط دیر ائلجه آنا یاسانین ۱۶۵-اینجی مادده‌سی ده آچیق محکمه‌لرین قورولوشونو وورغولایاراق ساده‌جه اخلاق ایله عومومی ایجتیماعی دیسپلینلرین پوزولماسینا سبب اولان قونولاری ایستیثنا ائدیب، آچیق قورولا بیلمه‌ین محکمه‌لر باره‌ده ایسه عدلییه سیستئمی، توپلوما سندلی-ایستیدلاللی ندنلر سونماقلا وظیفه‌لنمیشدیر.
۵۷-دئوریمین‌دن اؤنجه، پهلوی رئژیمی بئله سیاسی موخالیفلرینین بیر چوخو یا ان آزیندان تانینمیش آکتویستلر، چیریک لر ایله میلیتانلار بئله آچیق محکمه‌لرده یارقیلایاراق، محبوسلارا سوسیال رأی اؤنونده اؤز مؤوقئیین‌دن، دوشونجه‌سی ایله یاپدیقلاری باره‌ده دفاعیات وئرمکلرینی ساغلاییب، زامان وئریردی؛ ائلجه عدلیه‌ده محکوم اولانلارین چوخوسو، آچیق محکمه‌لرده آیدینلاتماغا چالیشماق واسیطه‌سی ایله گنل توپلوم طرفین‌دن تبرئه اولوردو. (۱)
اؤنجه آچیق محکمه‌نین اینسانی و آنایاسال بیر حاق اولدوغونو ساوونوب، سونرا فایدالار ایله گرکلرینی وورغولایاراق، فیکیرداشلاریمین آکتویست‌لریمیز اوچون آچیق محکمه طلبی اوزرینده قورولان کامپانییایا قاتیلیرام.
۱) «حزب توده، حزب ملل اسلامی، فیلیسطین، نهضت آزادی، جبهه ملی، مجاهدین خلق، مجاهدین خلق-م.ل، چریک های فدایی خلق» کیمی بیر چوخ اؤرگوتلر، کیرامت دانشیان، پرویز نیکخواه، خسرو گلسرخی کیمی بیر چوخ باغیمسیز آکتویستلر، آچیق محکمه‌ده یارقیلانمیشلار.
آ.ی: ویدیو چکمه‌یه آلیشقان اولمادیغیم اوچون قئیدیمی یازی فورمتینده حوضورونوزا سونورام.
