آذربایجان گرک قالسین، قالمالیدیر!
آذربایجان اراضی سینده یئنی اوستانلارین یارادیلماسی باره ده:
بو کیمی اولچولمه میش بیر مطالبه لر بارده دئیه بیله ریک:
بیرینجیسی: اولکه نین عمومی بودجه سینده، آذربایجان اوستانلارینین و شهرلرینین انکشافی و آبادلیغی اوچون اوزل بودجه ردیفی لحاظ اولماسا، آذربایجاندا هئچ بیر آبادلیق و انکشاف یارانمایاجاق!
یالنیز آذربایجان پارام – پارچا، یوخسول و ضعیف لشه جک دیر! باشقا بیر دییشیک لیک و باشقا بیر اتفاق دوشمه یه جک!
آیدین دیر، بوتوو آذربایجان، پارام_ پارچا آذربایجاندان داها گوجلو اولا بیلر؛ مرکزدن و مرکزچیلردن ده داها آرتیق امتیاز و امکانات آلا بیلر.
آذربایجان اراضی سینده یئنی اوستانلارین یارادیلماسینی مطالبه ائدنلرده ذرّه جه صداقت اولسا، هئچ زامان اوز ایسته ک و اونه ریلرینده، آذربایجانین عزیز و تاریخی آدینی حذف ائتمزلر، سیلمزلز!
آذربایجانین اردبیل بولگه سی اوستان اولدوغو زامان، چوخلاری بئله دوشونوردولر کی، اردبیل اوستان اولدوغو گونون صاباحی سیندان، سوییس سویّه سینده آبادلاشیب انکشاف ائده جکدیر.
آنجاق آذربایجانین اردبیل بولگه سی اوستان اولدوقدان بیر چوخ ایللر سونرا، بو گون گوروروک بو بولگه یوخسوللوق و فلاکت باتلیغانیندا ال- آیاق چالیر.
لوطفن آذربایجانین اردبیل اوستانین توابعیندن اولان گئرمی، بیله سوار (موغان) بولگه سینده بیر هفته اونجه گلن سئل اوجوباتیندان ضرر- زیانا دوشموش انسانلارین دورمونا دقت یئتیرین!
اهالینی قوروماق اوچون نسبی اولاراق موناسیب و اویقون بیر امکانلارین الده اولماسیندا هئچ بیر اثر و نیشان بوخدور؛ هئچ الوئریشلی بیر امکان یوخدور !
آذربایجانین اردبیل بولگه سینین آب و هاواسی، طبیعتی چوخ یاخشی و اورگه یاتان دیر. مثلن کئر( کویر) اولان بیر بولگه ده یئرلشن یزد اوستانییلا مقایسه ده، داها وئریملی بی طبیعتی واردیر. آنجاق وئریملی طبیعتی اولماسینا باخمایاراق، آذربایجانین اردبیل اوستانی همیشه مهاجر گونده ره ن بیر اوستان دیر. اردبیل بولگه سینده یاشایان انسانلار همیشه معیشتلرینی تامین ائتمک اوچون، وطنلرینی ترک ائدیب، ایش تاپماق اوچون تهران، اصفهان، یزد، کرمان، بندر عباس و… بولگه لرینه مهاجرت ائدیرلر. بو مهاجرتلره باخمایاراق آذربایجانین اردبیل اوستانی نین جمعیتی بیر کئر( کویر) بولگه سینده یئرلشمیش مثلن یزد اوستانی نین جمعیّتیندن آرتیق دیر.
عینی حالد کئر(کویر) بولگه سینده یئرلشن یزد اوستانی نین بودجه سی، اب و هاواسی چوخ یاخشی و اورگه یاتان اولان آذربایجانین اردبیل اوستانی نین بودجه سیندن نئچه قات آرتیق دیر. کئرده(کویرده) یئرلشن یزد اوستانی ثروتلی و مرفه دیر و آذربایجانین اردبیل بولگه سی یوخسول و آج-یالاواج دیر. چون آذربایجانین اردبیل اوستانینا کفایت قدر بودجه اختصاص وئرمیرلر.
کفایت قدر آذرباجانین اردبیل بولگه سینده سرمایا ایشه سالمیرلار. سرمایا یاتیرمیرلار.
اورنک اوچون: میانا- اردبیل دمیر یولونا دقت یئتیرین؛ ایللر دیر یاریمچیلیق دورومدا باشینا بوراخیلیبدیر، چونکو لازم اولان قدر بو دمیر یولونا بودجه اختصاص وئرمیرلر.
هابئله بیر حالداکی آذربایجان جمهوریتی ایله ارتباط اوچون میانا- اردبیل- بیله سوار دمیر یولو داها الوئریشلی، هزینه سی نسبتن آز و اولکه یه چوخ صرفه لیدیر. آنجاق مرکزچیلر چالیشیرلار، خرجی آغیر اولان و ایرانین شمالیندا یاشام چئوره سینی و مئشه لری تخریب و محو ائده بیلن، رشت- آستارا دمیر یول پروژه سینی ایره لی آپاریب اجرا ائتسینلر.
حتا میانا، اردبیل، آستارا دمیر یولو پروژه سی ده رشت- آستارا پروژه سیندن داها صرفه لیدیر.
یئنی اوستانلارین یارادیلماسییلا ایلگیلی منه بیر سورغو واردیر:
حال حاضرده گیلان اوستانی ترکیبینده اولان آذربایجانین آستارا بولگه سی نین اوستان اولماسینا نییه شرایط یاراتمیرلار، نییه اذن وئرمیرلر؟؟؟!! خصوصن کی، آستارادان گیلانین مرکزی اولان رشته گئدیب قاییتما بیر گون وقت آپاریر و اهالی اوچون چوخ زحمتلی بیر ایش دیر.
بلی، بئله دیر!
آذربایجانین پایی پارام-پارچا اولماق و یوخسوللوق دور، ثروت و رفاه ایسه یزد، اصفهان، کرمانین و… پایی دیر.
آذربایجانین اردبیل بولگه سی اوستان اولدوغو زامان، ایلک نووبه ده بو بولگه یه “شرقی آذربایجان=آذربایجان شرقی” آدینی تعیین ائتدیلر.
آذربایجانین تبریز بولگه سینه ده “مرکز آذربایجان= آذربایجان مرکزی” آدینی تعیین ائتدیلر. حتا بو یئنی اوستانلارین آدی و حریطه سی او ایلین درسلیک کتابلارینا داخل ائتمیشدیلر. آنجاق نئچه آیدان سونرا، یعنی همان ایلین سونوندا و یئنی گون بایرامی(نوروز بایرامی ) تعطیل گونلرینده، جماعتین باشی یئنی ایل شنلیکلری ایله قال اولدوغو گونلرده، ایرن اسلام شورا مجلسی، فرصتی غنیمت بیلیب و اهالی نین باشی نین قال اولماسیندان سویی استفاده ائدیب، بایرام تعطیل گونلرینده بیر اجلاس تشکیل ائده رک،
آذربایجانیمیزین عزیز آدینی آذربایجانین اردبیل بولگه سینین اوزه ریندن سیلیب، اونو اردبیل اوستانی آدلاندیردیلار. هابئله آذربایجانیمیزین تبریز بولگه سینه ” مرکز آذربایجان” یئرینه” شرقی آذربایجان” آدینی سئچدیلر.
او زامان ایران اسلام شورا مجلسی نین دوورو فعالیتلری سونا چاتدیقدا، مجلسین یئنی سئچگیلرینده اشتراک اوچون اردبیل شهرینین مجلس نوماینده سی جناب “نوعی اقدم”_ین صلاحیتی تصدیق اولمادیغی اوچون او، ایران گوزتچی شوراسیندان(شورای نگهبانیندان) گلایه ائده رک بیر مصاحبه ده اوز پارلاق و مثبت سابقه سینه یعنی آذربایجانین اردبیل بولگه سی اوزه ریندن آذربایجانین عزیز و تاریخی آدینین سیلینمه سینده فعالجاسینا اشتراک ائتمه سینه اشاره ائده رک بئله خدمتلر ائتدیگی اوچون ایران گوزتچی شوراسیندان(شورای نگهبانیندان) ایسته میشدیر کی، ایران اسلام شوراسی مجلسینین سئچکیلرینه اشتراک ائتمک اوچون، اونون صلاحیتینی تصدیق ائتسینلر.
جناب نوعی اقدم دئمیشدیر:
بیز پان تورکیزم ایله مبارزه ائتمک اوچون و اونلارین چالیشمالارینی و فعالیتلرینی دایاندیرماق اوچون، آذربایجان آدینی، آذربایجانین اردبیل بولگه سی اوزه ریندن سیلدیک! خصوصیله کی، ایسته ییردیک آذربایجان جمهوریتی فونشولوغوندا، آذربایجان آدلانان بیر بولگه اولماسین!
یعنی آذربایجان آدینین، آذربایجانین اردبیل بولگه سی اوزه ریندن سیلینمه سی، اونجه دن تام پلانلی، سیاسی، تورکلره ضد و آذربایجانا قارشی بیر ماهیت داشیییردی و….
بو گون هر بیر کس، آذربایجان اراضی سینده بئله یئنی بیر بولگولرین یارادیلماسی اوغروندا چالیشماق ایسته سه، بونو دا بیلمه لیدیر کی، آذربایجانیمیزین عزیز و تاریخی آدینی قورومالیدیر. آذربایجانین آدی سیلینمز، گرک ساخلانیلا !
نئجه کی، خوراسان اوستانی اوچ یئنی اوستانا بولوندوکده خوراسان آدینی ایتیرمه دی، بلکه قورویوب ساخلادیلار:
گونئی( جنوبی) خوراسان اوستانی
قوزئی( شمالی) خوراسان اوستانی
رضوی خوراسان اوستانی
بئله لیک له هربیر بهانه لر ایله، هر بیر کسلر، آذربایجان اراضی سینده یئنی اوستانلار یاراتماق ایسته سه لر، آذربایجانیمیزین عزیز و تاریخی آدینا سایغی ایله یاناشمالیدیر و یئنی یارادیلان اوستانلارین آدیندا، آذربایجان آدی اولمالیدیر، بو فخرلایق شرفلی آد، قورونوب ساخلانیلمالیدیر:
آذربایجان سهند اوستانی
اوستان سهند آذربایجان
آذربایجان آستارا اوستانی
اوستان آستارای آذربایجان
آذربایجان ساوه اوستانی
اوستان ساوه ی آذربایجان
آذربایجان اردبیل اوستانی
اوستان اردبیل آذربایجان
آذربایجان همدان اوستانی
اوستان همدان آذربایجان
آذربایجان زنجان اوستانی
اوستان زنجان آذربایجان
اوستان قزوین آذربایجان
آذربایجان قزوین اوستانی
اوستان البرز آذربایجان
آذربایجان ائلباروز اوستانی
اوستان قم آذربایجان
آذربایجان قوم اوستانی
و….
1402-03-18
