بیلیگی‌سایار گوونلیگی منبعیی اولان «چک‌پوینت» وب سایتی، ایسلام جومهوریییتی‌نین سیبر قوه‌لری‌نین ایسلام جمهوریییتینه قارشی اولان تشکیلاتلارا و وطنداشلارا قارشی تشکیل ائتدیگی و گئنیش میقیاسلی سیبر سالدیریلارا دایر اطرافلی بیر راپور یاییملادی. بو سیبر سالدیریلارین قوربانلاری آراسیندا اونلارلا آذربایجانلی فعال، دینی آزلیقلار و مدنی و سیاسی فعاللار دا وار.
۲۸ شهریور ۱۳۹۹-جی ایل جوما گونو یاییملانان بو راپورا گؤره، «شخصی سندلره و تلگرام حسابینا داخیل اولماق مقصدی ایله ویندوز سیستمینه» و «دینله‌مه و دیگر جاسوسلوق حادثه‌‌‌لری ایله بیر اندروید موبایل تلفونونو هک‌له‌مک» ایسلام جمهوریییتی سیبر قوه‌لری طرفیندن ایستیفاده اولونان تکنیکلردیر. «تلگرام فیشینگی و تلگراما بنزر بیر جاسوسلوق پروقرامی‌نین ایستیفاده‌سی»ده بو هکرلرین ایستیفاده ائتدیگی یوللاردان بیریدیر.
آذربایجان میلی مقاومت تشکیلاتی‌نین سؤزچوسو بابک چلبی، ۲۰۱۸-جی ایلین اکتبر آییندا بو سالدیریلارین قوربانی اولان آمریکادا یاشایان آذربایجانلی فعاللاردان بیریدیر. جناب چلبی اؤزل بیلگی‌سایارینا اولان سیبر سالدیریلارین آیرینتیلاری باره‌ده ایران‌وایره دانیشدی: «سون ایللرده دفعه‌‌لرله شوبهه‌لی ایمیل‌لر آلدیم، آنجاق ایمیل‌لرده اولان باغلانتیلاری آچمادیم. سیبر سالدیریلار باره‌ده العربیه تلویزیونونا وئردیگیم موصاحیبمدن سونرا اؤزونو العربیه‌نین باش یازاری کیمی تقدیم ائدن یانیلتیلمیش ایمیل [آدرِسیندن] بیر ایمیل آلدیم و بو شبکه‌یه وئردیگیم موصاحیبمدن آلدیقلاری شیکایتلره بیر باغلانتی واسطه‌‌‌سی ایله باخمامی ایستئمیشدی. باغلانتییی آچدیقدان سونرا بیر وبلاگا یؤنلندیم و نورمال بیر وبلاگ ایدی و شوبهه‌لنمه‌ییمه سبب اولان دیگر وبلاگ‌لار ایله هئچ بیر فرقی یوخ ایدی. بوندان سونرا اؤزل بیلگی‌سایاریمدا ديیشیکلیکلر گؤردوم و آراشدیردیغیم زامان ایسلام جمهوریییتی‌نین سیبر سالدیریسی هدفینده اولدوغومو آنلادیم.» جناب چلبی آمریکادا و اروپا اؤلکلرینده یاشایان آذربایجانلی فعاللار آراسیندا بو سالدیریلارین میقیاسیندان دانیشدی: «سیبر سالدیریلار باره‌سینده آپاردیغیم آراشدیرما و علاقه‌‌‌لردن سونرا [آنلادیم] ۷۰-دن چوخ آذربایجانلی فعال بو سالدیریلارین هدفینده اولموش.»
۲۰۱۸-جی ایلدن بری ایسلام جمهوریییتینه باغلی هکرلر اؤزل سیبر سالدیری متدلاریندان ایستیفاده ائده‌رک حوقوق مودافیه‌چیلری، حوقوقچولار و ژورنالیستلرین اؤزل بیلگی‌سایارلارینا و موبایل‌لارینداکی بیلگیلره ال چاتیبلار. دینی آزلیقلارین فعاللاری بو قروپون هدفلرینده اؤن سیرادا ایدیلر.
جناب چلبی ایران‌وایر ایله موصاحیبه‌سینده داوام ائدیر: «منی سیبر سالدیریلارا هدف آلدیقدان سونرا بعضی سوسیال شبکلرده اؤزل بیلگیلریم و عاید اولدوغوم تشکیلاتین بیلگیلری یاییملاندی. بو سیبر سالدیریلارا گؤره یاخین گونلرده ایسلام جمهوریییتینی محکمه‌‌یه وئرمک نيتینده‌یم.»
جناب چلبی ایران‌وایره دئییر: «منه قارشی سیبر سالدیریلارا علاوه اولاراق، عائله‌‌‌می زیارت ائتمک اوچون کئچن ایل تورکیه‌یه ائتدیگیم سفر زامانی منی ایسلام جمهوریییتی‌نین جاسوسلاری تعقیب ائتدیلر و بیر رستوراندا بعضی اینسانلار طرفیندن تهدید ائدیلدیم؛ منه یاخینلاشیب “جناب چلبی، گؤزوموز اوزرینده” دئین اینسانلار. بو تهدیددن سونرا دئتایلاری تورکیه گوونلیک پولیسینه بیلدیردیم و سفریمین سون گونونه قدر تورک پولیسی‌نین حمایه‌‌‌سینده اولدوم.»
ایسلام جمهوریییتی موختلیف اؤلکلری هدف آلان سیبر سالدیریلاری‌نین یانیندا، رژیمه قارشی اولان اینسانلاردان دا جاسوسلوق ائتمک اوچون بو سیبر سالدیریلار حیاتا کئچیریر. ایسلام جمهوریییتی، سیبر تهدیدین اکتورلاریندان بیری اولاراق، کوره‌سل کرونا اپیدمیسیندن ده ایستیفاده ائدیر و رژیمه قارشی اولانلارین علیهینه بو سالدیریلاری حیاتا کئچیریر.
۲۷ شهریور ۱۳۹۹ جوما آخشامی، آمریکانین قوزئی ویرجینییا ایالتی‌نین «الکساندریا» بؤلگه‌سینین ساوجیسی، ایسلام اینقیلابی کئشیکچیلری ایله علاقه‌‌‌لی اوچ ایرانلی هکره قارشی اتهام ایره‌لی سوردو. یئنی موتهیملر آراسیندا ۳۴ یاشلی «سعید پورکریم عربی» ۲۵ یاشلی «محمدرضا اسپارقام» و ۳۴ یاشلی «محمد بیاتی»نین آدی وار. اونلار آمریکاداکی خاریجی بیر تررور قروپو اولان ایسلام اینقیلابی کئشیکچیلری طرفیندن آمریکا شرکتلریندن اهميتلی اوزای و ماهواره تکنولوژی‌سی بیلگیلرینی اوغورلاماقدا گوناهلاندیریلیرلار.
